Մայիս 9, 2015-ին Գանատահայոց Թեմի Առաջնորդ Գերաշնորհ Տ. Աբգար Եպս. Յովակիմեան մասնակից եղաւ Հայոց Ցեղասպանութեան 100-ամեակին նուիրուած Աղօթքին, որ տեղի ունեցաւ Ս. Պօնիֆէյս Հռոմի Կաթողիկէ Եկեղեցւոյ մէջ՝ մատուցուած Գալկարիի Կաթողիկէ Եկեղեցւոյ Առաջնորդ Գերաշնորհ Տ. Ֆրետերիք Եպս. Հենրիի կողմէ, կազմակերպութեամբ Ատրիան Մարթէնս Սարկաւագի եւ համագործակցութեամբ Գալկարիի Ս. Զօրաւոր Հայց. Առք. Եկեղեցւոյ Ծխական Խորհուրդի Ատենապետուհի Տիկ. Մայտա Պէյլէրեանի:

Արարողութիւնը կայացաւ Հէնրի Քհնյ. Ռոզենպաում եւ Ատրիան Մարթէնս Սարկաւագի մասնակցութեամբ, իսկ օրուայ քարոզիչն էր Պրայըն Քհնյ. Հուպկա։ Սոյն արարողութեան ներկայ էին նաեւ Ղըպտի Ուղղափառ Եկեղեցւոյ Քահանայ Տէր Աղաթօն Սայետ, որ իր գնահատանքը յայտնեց Հայ Դատի հարցով համայնքէն ներս տարուած աշխատանքներուն համար:

Զարուհի Սուքիասեան եւ Լէյլա Ապաճեան Աղօթքի սոյն արարողութիւնը զարդարեցին երգելով Հայ Առաքելական Ս. Եկեղեցւոյ Պատարագի շարականներէն:

Ատենապետուհի Տիկ.Մայտա Պէյլէրեան շնորհակալութիւն յայտնեց ներկայ հոգեւորականներուն եւ համայնքի ներկայացուցիչներուն: Տիկին Պէյլէրեան ընթերցեց նամակներ յղուած Գանատայի Կառավարութեան Երեսփոխան Միշէլ Ռեմթըլի, Ալպերթայի նորընտիր Վարչապետ Ռէյչըլ Նօթլիի գրասենաեակին եւ Գալկարի քաղաքի Հրեաներու Դաշնութեան ներկայացուցիչներ Պրուս Լիպին, Ճէֆրի Սմիթ եւ Ադամ Սիլվըրի կողմէ:

Սրբազան Հայր Աբգար Եպս. Յովակիմեան իր գնահատանքի խօսքը ուղղեց հոգեւորականներուն եւ Հռոմի Կաթողիկէ Եկեղեցւոյ Թեմին, որ իրենց յարգանքի տուրքը մատուցեցին մեր Սրբադասուած Հայ Նահատակներուն յիշատակին համար եւ օրհնեց բոլոր ներկաները:

 

Click to read a letter from the Calgary Jewish_Federation