Առաջնորդի մասնակցութիւնը Հայոց Ցեղասպանութեան Նահատակներու Սրբադասման Արարողութեան

 

23 Ապրիլ 2015-ին, Գանատահայոց Թեմի Առաջնորդ Գերշ. Տ. Աբգար Եպս. Յովակիմեան, Աստուածաշնչեան Արարատի հայեացքին ներքոյ, Մայր Աթոռ Ս. Էջմիածնի մէջ մասնակցեցաւ Հայոց Ցեղասպանութեան Նահատակաց Սրբադասման արարողութեան, որ ամենամեծ եւ նշանակալից սրբադասման արարողութիւնն էր Հայ ժողովուրդի պատմութեան մէջ: Ան տեղի ունեցաւ Հայոց Ցեղասպանութեան 100-րդ ամեակի նշումէն մէկ օր առաջ եւ նշանակուեցաւ, որպէս կարեւորագոյն իրադարձութիւնը՝ Հայ ժողովուրդի պատմութեան մէջ, յատկանշելով թէ՝ Հայաստանեայց Առաքելական Եկեղեցւոյ մէջ ոչ մէկ սրբադասում տեղի ունեցած չէր աւելի քան 400 տարիներէ ի վեր:

Սրբադասման արարողութիւնը կատարուեցաւ Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Կաթողիկոս Ամենայն Հայոց եւ Ն.Ս.Օ.Տ.Տ. Արամ Ա. Կաթողիկոս Մեծի Տանն Կիլիկիոյ Վեհափառ Հայրապետներու գլխաւորութեամբ:

Կրօնական եւ աշխարհիկ առաջնորդներ՝ աշխարհի բոլոր կողմերէն հաւաքուած էին Մայր Աթոռ Ս. Էջմիածին, մասնակից ըլլալու պատմական Սրբադասման արարողութեան, ի պատիւ՝ Հայոց Ցեղասպանութեան Սրբոց Նահատակաց յիշատակին:

«Մենք կը հաւատանք, որ մեր ժողովուրդի հոգեւոր նոր վերածնունդի պսակը կը հիւսենք` Հայոց Ցեղասպանութեան նահատակները սրբադասելով: Մեր սուրբ նահատակներու յիշատակը այլեւս ոչ թէ զոհի ու ննջեցեալի հոգեհանգստեան աղօթք է, այլ՝ յաղթանակած ու նահատակութեան արեամբ սրբագործուած անմարմին զինուորներու յաղթական օրհներգութիւն:», ըսաւ Ամենայն Հայոց Կաթողիկոս Գարեգին Բ.

Արարողութիւնը եզրափակուեցաւ 19:15-ին (Երեւանի ժամով) համակարգուած աշխարհասփիւռ եկեղեցական զանգերու 100 ղօղանչումներով, խորհրդանշելու Հայոց Ցեղասպանութեան տարին եւ դարը որ անցած է:

Արարողութեան ընթացքին, օգտագործուեցան Հայց. Առաք. Եկեղեցւոյ 14 մեծանուն սրբութիւնները՝ Ս. Գեղարդը, Ս. Գրիգոր Լուսաւորիչի Աջը, Կենաց Փայտով խաչ-մասունքարանը, Աքեւրայի մասանց պահարանի կրկնօրինակը, Ս. Ստեփանոս Նախավկայի մասունքով Աջը, Ս. Անանիա առաքեալի մասունքով Աջը,Ս. Սահակ Պարթեւ Հայրապետի մասունքով Աջը, Ս. Սարգիս Զօրավարի մասունքով Աջը, Ս. Գէորգ Զօրավարի մասունքով Աջը, Ս. Թաթէոս եւ Ս. Սանդուխտ կոյսի մասունքներով խաչ-մասունքարանը, Ս. Յովհաննէս Մկրտիչի մասունքով խաչ-մասունքարանը,Ս. Գրիգոր Նարեկացիի եւ այլ սուրբերու մասունքներով մասունքարանը եւ Զէյթունի Աւետարանը:

 

 

Back to top
X