Գանատայի Հայոց Ցեղասպանութեան 100-ամեակի միջոցառումներու կազմակերպիչ յանձնախումբին նախաձեռնութեամբ Կիրակի Ապրիլ 19, 2015-ին տեղի ունեցաւ յիշատակի միջոցառում եւ բազմահազարանոց քայլարշաւ Թորոնթոյի մէջ, Օնթարիոյի նահանգային Խորհրդարանի «Քուինզ» զբօսավայրին առջեւ: Քայլարշաւին մասնակցեցան ոչ միայն հինգ հազարէն աւելի թորոնթոյի հայերը, այլ զանազան համայնքներու ներկայացուցիչներ, ինչպէս՝Պոնտացի յոյներ, ասորիներ, հրեաներ, քիւրտեր, ռուանտացիներ եւ կիպրացիներ:

Միջոցառումին մասնակցող պատուաւոր հիւրերուն շարքին էին Օնթարիոյի Վարչապետ Քաթլին Ուեյնը, ազգային պաշտպանութեան եւ բազմամշակոյթայնութեան նախարար Ճէյսըն Քենին, Թորոնթոյի քաղաքապետ Ճոն Թորին, Դաշնակցային եւ Նահանգային կառավարութիւններու ներկայացուցիչներ, Գանատայի մօտ ՀՀ Արտակարգ եւ Լիազօր Դեսպան Արմէն Եկանեանը, դիւանագէտներ, Գերաշնորհ Հայրեր՝ Աբգար Եպիսկոպոս Յովակիմեանը եւ Մեղրիկ Եպիսկոպոս Բարիքեանը, Հոգեւոր Հայրեր եւ համայնքային կառոյցներու ներկայացուցիչներ: Միջոցառումին գլխաւոր բանախօսն էր Գանատահայ հանրաճանաչ կինոռեժիսոր Ատոմ Էկոյեանը:

Պատուաւոր հիւրերու ելոյթէն յետոյ սկսաւ Միասնութեան երթը՝ Քուինզ Պարքէն դէպի Թորոնթոյի Մետրոպոլիտէն Յոյնայթեդ Եկեղեցին, ուր տեղի ունեցաւ Միջհամայնքային Հանդիսաւոր Հաւաքական Աղօթքի արարողութիւնը: Ցեղասպանութեան զոհերու յիշատակին նուիրուած այս իւրօրինակ միջեկեղեցական արարողութիւնը կազմակերպուած էր Թորոնթոյի Հայ եկեղեցիներու Միջհարանուանական Մարմինին կողմէ՝ եւ որուն մաս կազմեց նաեւ Սբ. Երրորդութիւն Հայց. Առաքելական, Սբ. Աստուածածին Հայց. Առաքելական, Սբ. Գրիգոր Լուսաւորիչ Հայ Կաթողիկէ եւ Հայ Աւետարանչական եկեղեցիները: Իրենց համատեղ եւ միասնական ելոյթով արարողութեան մասնակցեցան նաեւ վերոյիշեալ եկեղեցիներուն երգչախումբերը: Իսկ բազմաքանակ հաւատացեալ ժողովուրդը իր աննախընթաց ներկայութեամբ լեցուցեր էր ոչ միայն եկեղեցին այլեւ եկեղեցիին բակը:

Թորոնթոյի Հայ եկեղեցիներու Միջհարանուանական Մարմինի կողմէն բացման խօսքով հանդէս եկաւ Սբ. Երրորդութիւն Հայց. Առաքելական եկեղեցւոյ հոգեւոր հովիւ Տ. Զարեհ Աւագ Քահանայ Զարգարեանը: Ան բարի գալուստ մաղթեց Գանատայի մօտ ՀՀ Արտակարգ եւ Լիազօր Դեսպան Արմէն Եկանեանին, Գանատայի Դաշնային եւ Նահանգային կառավարութիւններու ներկայացուցիչներուն ու պատուաւոր հիւրերուն: Տեր Զարեն յատուկ գնահատանքի եւ շնորհակալութեան խօսք ուղղեց Թորոնթոյի Կաթողիկէ համայնքի Հոգեւոր Առաջնորդ Թովմաս Գարտինալ Քոլինզին, Գանատայի Անկլիքան եկեղեցւոյ Թորոնթոյի թեմի Առաջնորդ Քոլինզ Արքեպիսկոպոս Ճոնսոնին, Միսիսոկայի եւ Վանքուվըրի Ղպտի Ուղղափառ Եկեղեցւոյ Առաջնորդ Եպիսկոպոս Մինային, ինչպէս նաեւ յոյն Ուղղափառ Եկեղեցւոյ, Գանատայի Եթովպիայի Սրբազան Սինոդի, Գանատայի Պրեսբիտերական Եկեղեցւոյ, Մետրոպոլիտեն Յոյնայթեդ Եկեղեցւոյ, Սբ. Մարկոս Ղպտի Ուղղափառ Եկեղեցւոյ, Գանատայի Միացեալ Եկեղեցւոյ (United Church) բարձրաստիճան հոգեւորականներուն եւ Գանատայի Եկեղեցիներու Խորհուրդին:

Հայաստանի Հանրապետութեան կառավարութեան կողմէ ելոյթ ունեցաւ Մեծարգոյ Դեսպան Արմէն Եկանեանը, իսկ Գանատահայ հաւատացեալ ժողովրդի անունով հանդէս եկան Գերշ. Տ. Աբգար Եպիսկոպոս Յովակիմեանը եւ Գերշ. Տ. Մեղրիկ Եպիսկոպոս Բարիքեանը:

Արարողութեան ընթացքին քարոզեց Թորոնթոյի Կաթողիկէ Համայնքի Հոգեւոր Առաջնորդ Թովմաս Գարտինալ Քոլինզը՝ իր քարոզը նուիրելով Ցեղասպանութեան զոհերու յիշատակին:

Այս հոգեպարար եւ ընդհանրական արարողութեամբ պատշաճի յարգանքի տուրք մատուցուեցաւ բոլոր անմեղ զոհերու յիշատակին՝ քաջալերելով բոլորին շարունակել պայքարը մարդկութեան դէմ գործածուած բոլոր տեսակի բռնութիւններու դէմ:

Կը ցանկանանք գնահատանքի խօսք ուղղել Գանատայի Խորհրդարանի Հանրային Պալատին եւ Կառավարութեան, Օսմանեան Թուրքիոյ կողմէ իրագործուած Հայոց Ցեղասպանութիւնը ճանչնալու համար:

Խորին շնորհակալութիւն կը յայտնենք նաեւ Գանատայի Հայոց Ցեղասպանութեան 100-ամեակի միջոցառումներու կազմակերպիչ յանձնախմբին՝ իրենց անսահման նուիրուածութեան, տարած լայնածաւալ ու կազմակերպուած աշխատանքին համար: