Ecumenical Prayer 2015

 

ARM_5702Բազմահազար Հայորդիներ Հաւաքուեցան Ոգեկոչելու Ապրիլեան Նահատակաց Յիշատակը Ս. Ժոզէֆ Եկեղեցիէն Ներս

Մամլո դիւան

Երկուշաբթի, 20 Ապրիլ 2015ին, Մոնթրէալի Ս. Ժոզէֆ Եկեղեցիէն ներս, տեղի ունեցաւ Ապրիլեան Նահատակաց ոգեկոչման արարողութիւն, ի յիշատակ Հայոց Ցեղասպանութեան 1.5 միլիոն անմեղ զոհերուն, որք ի կատար ածան ի ձեռն ցեղասպան թուրքիոյ։

Ներկայ էր մօտաւորապէս 3000 հաւատացեալ հաշուող բազմահոծ ժողովուրդը, հայ եւ օտար մասնակիցներով։ Արարողութիւնը կատարուեցաւ կազմակերպութեամբ Հայաստանեաց Առաքելական, Հայ Կաթողիկէ եւ Հայ Աւետարանական Եկեղեցիներուն եւ մասնակցութեամբ Մոնթրէալի Կաթողիկէ Եկեղեցւոյ Առաջնորդին, Մոնթրէալի Անկլիքան Եկեղեցւոյ, Անտիոքայ Եկեղեցւոյ, Ասորի Ուղղափառ Եկեղեցւոյ, Անտիոքի Յոյն Ուղղափառ Եկեղեցւոյ, Յոյն Կաթողիկէ եւ Ռումանական Ուղղափառ Եկեղեցւոյ։

Թափորի շքերթին իր մասնակցութիւնը բերաւ Ալէքս Մանուկեան, Ս. Նարեկ եւ Ս. Յակոբ Դպրոցներու աշակերտութիւնը, ինչպէս նաեւ Հ.Բ.Ը.Մ.-ի եւ Հ.Մ.Ը.Մ-ի Սկաուտները։ Թափորի ընթացքին երգուեցաւ «Հրաշափառ»ը, Մոնթրէալի միացեալ երգչախումբին կատարողութեամբ եւ ղեկավարութեամբ տիկին Հասմիկ Գասպարեանի։

Գերյարգելի Տ. Գէորգ Ծ. Վրդ. Զապարեան խօսք առնելով, բացումը կատարեց ու ապա Տէրունական աղօթքով սկիզբ առաւ արարողակարգը։ Օտար Եկեղեցապետեր աղօթքներով ու պատգամներո, յիշեցին զոհերը եւ դատապարտեցին մարդկութեան նկատմամբ կատարուած ոճիրներն ու անարդարութիւնները։

Արարողութեան ընթացքին միացեալ երգչախումբը ոգելից շարականներով տիրող մթնոլորտին տուաւ առաւել հմայք, խորհուրդ եւ ապրում։ Ղեկավարուհի Տիկին Հասմիկ Գասպարեանը մեներգեց Կոմիտաս Քէշիշեանի մշակած շարականներէն մին ապա Թէնոր Էլի Պէրպէրեան մեներգեց Ալպէրթ Հէյ Մալօթթ-ի մշակած Տէրունական Աղօթքը, հայերէն եւ անգլերէն լեզուներով։

Կատարուեցաւ մոմավառութիւն. աշակերտները եւ սկաուտները եկեղեցական դասէն առնելով լոյսը, տարածեցին համայն ներկաներուն։ Ներկայ հաւատացեալները միաբերան երգեցին Տէր Ողորմեան։ Հոգեշնորհ Տ. Վարդան Աբղ. Թաշճեան  ճաճանչաձեւ սրբատուփը, որ կը ներառէր Տէր Զօրի եղեռաբախտ նահատակներէն մէկուն աճիւնը, կարմիր շղարշով,  ձեռամբարձ միացաւ շքերթին ու զայն զետեղեց եկեղեցւոյ խորանի զոհասեղանին վրայ։

Մոնթէալի Կաթողիկէ համայնքի Առաջնորդ Գերյարգելի Տ. Քրիստիան Եպիսկոպոս Լէբին դարձաւ օրուան գլխաւոր պատգամախօսը։

Արարողութիւնը իր աւարտին հասաւ նահատակներու հոգիներուն համար կատարուած աղօթքով, որուն յաջորդեց Կիլիկիոյ քայլերգի եւ Էջմիածին մաղթերգի երգեցողութիւնը թափորին յառաջընթացով, որուն կը գլխաւորէին Աբգար Եպս. Հովակիմեանն ու Մեղրիկ Եպս. Բարիքեանը։

 

1477963_10153324220123783_4576932563298507363_n   10690049_10153324344343783_4566548608703029895_n  11148374_10153324221398783_8183842713416575781_n   11156161_10153322296073783_3309354535482525243_n 13718_10153324344348783_5784675820060428975_n   11178249_10153322296018783_5918003313499101938_n

Photos © Hovig Boghossian