Գերշ. Տ. Աբգար եպս. Յովակիմեան մասնակցեցաւ Գանատայի Անկլիքան եկեղեցւոյ Եպիսկոպոսաց Տան համագումարին

Երեքշաբթի, Ապրիլ 14, 2015-ին, Գանատահայոց Թեմի Առաջնորդ՝ Գերշ. Տ. Աբգար եպս. Յովակիմեան, Մոնթրէալի Անկլիքան Եկեղեցւոյ Գերշ. Տ. Պարրի Եպիսկոպոս Գլարքի հրաւէրով, մասնակցեցաւ Նիակարայ Ֆօլզի մէջ գումարուած Գանատայի Անկլիգան Եկեղեցւոյ Եպիսկոպոսաց Տան համագումարին եւ այդ առիթով հրաւիրուեցաւ բանախօսութիւն մը ներկայացնելու:

Սրբազան Հայրը իր խօսքերը կեդրոնացուց Հայոց Ցեղասպանութեան Հարիւրամեակին վրայ եւ անոր հետեւանքներուն կարեւորութեան վրայ արդի աշխարհին վերաբերեալ: Սրբազան Հայրը հաղորդեց թէ 20-րդ դարը գիւտարարութեան դարն էր, թէեւ մարդկային ուղեղին մէջ ծնած բոլոր գաղափարները չ’օգնեցին որ այս աշխարհը՝ ապրողներու համար աւելի հաճելի վայր մը դառնար: Քսաներորդ դարու այսպիսի նորածին «գիւտ» մը եղաւ ցեղասպանութեան ոճիրը, որ գործադրուեցաւ հայերու դէմ, միակ նպատակ ունենալով հայոց ինքնութեան ամբողջական բնաջնջումը:

Սրբազան Հայրը բաժնեկից ըրաւ գանատական Անկլիքան Եպիսկոպոսները Ամենայն Հայոց Կաթողիկոս Գարեգին Բ-ի իղձերուն եւ յոյսերուն զորս ան արտայայտեց Կիրակի, Ապրիլ 12, 2015-ին Վատիկանի Սուրբ Պետրոս Պազիլիքի մէջ տուած պատգամին ընթացքին եւ ըսաւ որ այս տարուան 23 Ապրիլին, Հայոց Ցեղասպանութեան 100-րդ տարելիցին, մասնակից քոյր եկեղեցիներու աղօթքներով ու բարձրաստիճան հիւրերով եւ աշխարհասփիւռ հազարաւոր հաւատացեալներով Մայր Աթոռ Ս. Էջմիածնի մէջ պիտի սրբադասուին Հայոց Ցեղասպանութեան զոհերը:

Back to top
X