$
Select Payment Method
Personal Info

Billing Details

Donation Total: $365.00

Սիրելի Գանատահայ հաւատաւորներ,

Անհուն երախտագիտութեամբ այս տարուայ կոչս կ՚ուղղեմ ու Ձեր ազնիւ ուշադրութեան կը յանձնեմ Թեմի գործունէութեան մասին տեղեկութիւնը, եւ կը հրաւիրեմ Ձեզի սիրելի Հայորդիներ նպաստելու մեր Մայր Եկեղեցւոյ առաքելութեան իրականացմանը։

Տիրոջ օրհնութեամբ եւ Ձեր աջակցութեամբ՝ Թեմէն ներս տեղի ունեցան նշանակալի ձեռքբերումներ:

Փետրուար 2019-ին, մենք գնեցինք Թորոնթոյի մէջ նախկին Արմէն Օնթարիոյ/ՀԲԸՄ-ի կալուածը եւ Օգոստոս 2019-ին, գնեցինք Օթթաուայի մէջ նոր Հայկական եկեղեցի ու հասարակական կեդրոնը:

Փետրուար 2019-ին, Թեմը կազմակերպեց Գանատայի Զինուած Ուժերու հոգեւոր առաջնորդ պաշտօնական այցը Հայաստան, ի նպաստ Հայաստանի եւ Գանատայի Զինուած Ուժերու հոգեւոր ծառայութիւններու միջեւ համագործակցութեանը:

Օգոստոս 2019-ին, «Արարատ» ամառնային երիտասարդական տարեկան ճամբարը, ունեցաւ Թեմի բոլոր կողմերէն հաւաքուած 188 մասնակից ճամբարականներ ու պատասխանատուներ:

Մայիս 2020-ին, Թեմի յարակից «Հայասատանի Երեխաներու Հիմնադրամ» (CFFA) պիտի նշէ իր 30-ամեակը: Երեք տասնամեակներէ ի վեր CFFA-ը կ’աջակցի Հայաստանի մէջ ապրող որբերուն եւ կարիքաւոր ընտանիքներուն:

2020-ին, Թեմը կ’աջակցի Աւագաժողովի (Senate) նախագահի հովանու ներքոյ, Օթթաուայի մէջ կազմակերուած Ազգային Քրիստոնէական Երիտասարդական Վեհաժողովին, երիտասարդ համայնքային առաջնորդներու մասնակցութիւնը ծաւալելու գործին:

Հոկտեմբեր 2019-ին, Գանատահայոց Գեղարուեստական Ներկայացումներու Միութիւնը (CAAPA), Թորոնթոյի Koerner Hall սրահի մէջ, Կոմիտաս վարդապետի ծննդեան 150-ամեակին նուիրուած համատեղ բացառիկ միջոցառում մը կազմակերպեց:

2017 թուականի հիմնադրման օրէն ի վեր Թեմի Հոգատարութեան Ծրագիրը մեզի կ’օգնէ ապահովել մեր եկեղեցւոյ կենսունակութիւնն ու բարգաւաճումը:

Թեմի կայքէջի, տարեգրքի ու շրջաբերականներու միջոցով պարբերաբար կը տեղեկացուիք Թեմի հսկայական ձեռնարկներու մասին, որոնք մեծ ջանքեր ու նիւթական աջակցութիւն կը պահանջեն։

ԱՆՇՈՒՇՏ ԱՅՍ ԱՄԷՆԸ
ԱՌԱՆՑ ՁԵՐ ՕԺԱՆԴԱԿՈՒԹԵԱՆ ՉԷՐ ԻՐԱԿԱՆԱՆԱՐ։

Սիրելի քոյրեր եւ եղբայրներ ի Քրիստոս,

Որքան մեծ պատիւ ու ակնածանք է մեր Թեմին աջակցիլը: Ձեզի կը դիմեմ խնդրանքով, որ բանաք Ձեր սրտերը ու նիւթապէս եւ բարոյապէս աջակցիք Մայր Եկեղեցւոյս առաքելութեանը, առ ի փառաբանութիւն Ամենակալ Տիրոջ, ինչպէս երկնքի մէջ այնպէս ալ երկրի վրայ։ Ամէն։

ՔՐԻՍՏՈՍ ԾՆԱՒ ԵՒ ՅԱՅՏՆԵՑԱՒ.
ՕՐՀՆԵԱԼ Է ՅԱՅՏՆՈՒԹԻՒՆՆ ՔՐԻՍՏՈՍԻ:

Աղօթքով՝
Տ. Աբգար եպս. Յովակիմեան
Առաջնորդ Գանատահայոց