Դեկտեմբեր 11, 2019-ին, Պոլսոյ մէջ գումարուած ժողովի ընթացքին, 119 պատգամաւորի 102-ի ձայնով ընտրուեցաւ Պոլսոյ Հայոց 85-րդ Պատրիարք՝ Գերշ. Տ. Սահակ Եպս. Մաշալեանը:

Մարտ 2019-էն, Երանաշնորհ Պատրիարք Տէր Մեսրոպ Բ. Մութաֆեանի մահուամբ Նուիրապետական Աթոռը թափուր մնացած էր:

Յուլիս 2019-ին, Գերշ. Տէր Սահակ եպիսկոպոսը, որպէս Պատրիարքական տեղապահ ընտրուեցաւ մինչեւ Պոլսոյ Հայոց նոր Պատրիարքի ընտրութիւնները:

Դեկտեմբեր 12-ին, Ն.Ս.Օ.Տ.Տ. Գարեգին Բ Ծայրագոյն Պատրիարք և Ամենայն Հայոց Կաթողիկոսը, իր օրհնութիւնն ու հայրապետական ողջոյնը փոխանցեց նորընտիր Պատրիարք Հօր:

Դեկտեմբեր 11-ին, Գանատահայոց Թեմի բարեջան Առաջնորդ Գերշ. Տ. Աբգար եպս. Յովակիմեանը, իր սրտագին շնորհաւորանքները փոխանցեց ընտրեալ Պատրիարքին:

Տեղին է նշել, որ Պոլսոյ Հայոց Պատրիարքարանը հիմնադրուեր է 1461-ին, դառնալով Հայ Առաքելական Եկեղեցւոյ Նուիրապետական չորս Աթոռներէն մէկը: Միւս երեքն են՝ համայն Հայութեան հոգեւոր կեդրոն Մայր Աթոռ Սուրբ Էջմիածինը, Մեծի Տանն Կիլիկիոյ Կաթողիկոսութիւնը եւ Երուսաղէմի Հայոց Պատրիարքութիւնը: