Օգոստոս 18, 2019-ին, յաւարտ Ս. Աստուածածնայ Վերափոխման տօնի առիթով մատուցուած Սուրբ եւ Անմահ Պատարագին ու Խաղողօրհնէքի արարաողութեան, Թեմիս բարեխնամ Առաջնորդ Գերաշնորհ Տ. Աբգար եպիսկոպոս Յովակիմեանի նախագահութեամբ տեղի ունեցաւ Օթթաուայի Սուրբ Մեսրոպ Հայց. Առաք. Եկեղեցւոյ Արտակարգ Անդամական Ժողովը:
Ժողովը գումարուած էր քննարկելու Օթթաուայի մէջ հայկական եկեղեցի ու համայնքային նոր կեդրոն ունենալու նպատակով՝ 5065 Thunder Road հասցէով, 6 ակր տարածութեամբ հողի եւ նախկին Carlsbad Springs հասարակական կեդրոնի գնելու հարցը:
Ժողովը բաց էր՝ երկրիս մայրաքաղաքի համայն հայութեան համար:
Ծխական Խորհուրդի գանձապահ Տիար Ժան-Ֆիլիփ Թաշճեանը մանրամասն ներկայացուց Օթթաուայի Սուրբ Մեսրոպ Հայց. Առաք. Եկեղեցւոյ՝ սեփական եկեղեցի ու համայնքային կեդրոն մը ունենալու, վերջին 40 տարիներու տքնաջան գործունէութեանց մասին:
Ապա Պարոն Թաշճեանը ներկայացուց Ծխական Խորհուրդի վերջին նախաձեռնութիւնը, հողի ու շէնքի վրայ կատարուած զանազան ուսումնասիրութիւնները եւ պատասխանեց հարցերուն:
Քննարկումներու աւարտին՝ Օթթաուայի մէջ 5065 Thunder Road հասցէով կալուածը գնելու մասին որոշումը հաստատուեցաւ Արտակարգ Անդամական ժողովի կողմէն:
Ծխական Խորհուրդի համար՝ վաճառքը փակելու վերջին ժամկետը Օգոստոս 29, 2019-է:
14 Յունիս 2019-ին, Օթթաուայի Սուրբ Մեսրոպ Հայց. Առաք. Եկեղեցւոյ Ծխական Խորհուրդի փակ յայտի միջոցով, Օթթաուայի քաղաքապետարանի կողմէն ընդունուեցաւ՝ 5065 Thunder Road հասցէով, 6 ակր տարածութեամբ հողի եւ նախկին Carlsbad Springs հասարակական կեդրոնի գնման առաջարկը:
11 Յուլիս 2019-ին, Օթթաուայի քաղաքապետարանը հաստատեց կալուածի վաճառքը:
